Ադրբեջանի ցեղասպան քայլերը բարձրաձայնվեցին Հաագայում տեղի ունեցած ցեղասպանությունների կանխարգելման վերաբերյալ մասնագիտական քննարկմանը

05 դեկտեմբերի, 2022

Նիդերլանդներում ՀՀ դեսպան Տիգրան Բալայանը՝ Լյուքսեմբուրգի դեսպանության հրավերով մասնակցեց վերջինիս կողմից Միջազգային քրեական դատարանի անդամ երկրների 21-րդ վեհաժողովի շրջանակներում կազմակերպված «Ցեղասպանության կանխարգելման պարտավորության իրականացումը միջազգային իրավունքի ներքո» խորագրով քննարկմանը, որին ներկա էին անվանի գիտնականներ, միջազգային դատական ատյանների դատավորներ, դեսպաններ։

Հիմնական բանախոս պրոֆեսոր Հուննա Գերրին, անդրադառնալով մեր օրերում ցեղասպանության վտանգին առերեսվող ժողովուրդներին, ընդգծեց Ադրբեջանի կողմից Արցախի և Հայաստանի բնակչությանը սպառնացող ցեղասպան գործունեությունները։ Պրոֆեսոր Գերրին շեշտեց, որ 2020թ. ինչպես «Genocide Watch» -ը, այնպես էլ Լեմկինի ինսիտուտը, բազմաթիվ զգուշացումներ են հրապարակել Ադրբեջանի քայլերի և հռետորաբանության իրական վտանգների մասին, սակայն այդ ամենը չի արժանացել պատշաճ միջազգային արձագանքի։

Իր խոսքում դեսպան Տիգրան Բալայանը նշեց, որ ներկայումս տեղի ունեցող իրադարձությունները հիշեցնում են 20-րդ դարի սկզբին տիրող իրավիճակը, երբ միջազգային մամուլը և Օսմանյան Կայսրությունում աշխատող դիվանագետները գրում էին հայերի ջարդերի մասին, սակայն Օսմանյան իշխանությունները շարունակում էին հայերի կոտորածները` համոզված լինելով, որ անպատիժ են մնալու։

«Ադրբեջանի իշխանությունները՝ ամենաբարձր մակարդակով, ամեն օր կոպտագույն կերպով խախտում են Արդարադատության միջազգային դատարանի միջանկյալ միջոցները` խորացնում հայերի դեմ ատելությունը, սպառնում նոր բռնություններով, ոչնչացնում հայկական ժառանգությունը` համոզված լինելով, որ անպատիժ են մնալու», ընդգծեց դեսպան Բալայանը։

Հայաստանի դեսպանը նշեց, որ միջազգային դերակատարների կողմից երկակի ստանդարտների կիրառումը բերում է աղետալի հետևանքների, որոնք տեսանելի են և խաթարում են միլիոնավոր մարդկանց կյանքեր՝ աշխարհի տարբեր անկյուններում, նաև Կովկասյան տարածաշրջանում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր